Во кујна со Зорица: Рецепт за совршен велигденски милиброд (козињак)
„Козињакот е еден од оние рецепти што неизбежно се подготвува во нашиот дом за Велигден. Речиси секоја година го правам со многу љубов“ - вели за CRNOBELO.com Зорица од Берово и споделува целосен рецепт за милиброд, но открива и трик за да ви излезе совршен.
Зорица Цонкинска, по потекло од село Митрашинци, Берово веќе 12 години живее во Германија со сопругот и е мајка на 3 деца.
Таа е вљубеник во готвењето, а посебно ги сака традиционалните рецепти, заради вкусовите и обичаите со кои е порасната и сака да им ги пренесе на своите деца иако живеат далеку од татковината.
На социјалните мрежи Зорица редовно објавува рецепти, а овој пат за CRNOBELO.com го сподели и рецептот за велигденски милиброд, или козињак, како што многумина го нарекуваат.
„Козињакот е еден од оние рецепти што неизбежно се подготвува во нашиот дом за Велигден. Речиси секоја година го правам со многу љубов, бидејќи за мене тој не е само десерт, туку и дел од семејната традиција и празничната атмосфера.
Еден мал трик што би го споделила со читателите е тестото за козињакот да се меси трпеливо и да се остави доволно време да стасува на топло место.
Колку подолго стасува тестото, толку козињакот ќе биде помек, повоздушест и со повеќе убави конци внатре“ - вели Зорица за CRNOBELO.com.
Потребни состојки:
- 40g свеж квасец
- 170g шеќер
- Малку сол
- 2 пакетчиња ванилин шеќер
- Една кора од портокал
- 80g маргарин
- 4 лажици масло
- 3 јајца
- 120ml млеко
- Околу 600g брашно
- Жолчка со 2 лажици млеко за премачкување
Начин на подготовка:
- Со 50 мл млако млеко се зафаќа квасецот со малку шеќер и брашно. Се остава да се активира.
- Настрана се топи шеќерот со преостанатото млако млеко заедно со маргаринот и ванилиниот шеќер.
- Активираниот квасец се става во сад, се додава изладеното млеко со шеќерот и маргаринот, му се додава и маслото, претходно изматените јајца и полека се додава брашното. Јас прво ги матев со миксер со маталките за тесто, а потоа со рака.
- Се ренда и кора од портокал. Тестото треба да се меси подолго време – на тој начин ќе стане поеластично и ќе има повеќе конци.
- Се покрива со фолија и со кујнска крпа и се остава на топло место 2–3 часа (може и повеќе, уште поубаво).
- Откако ќе стаса, се премесува уште еднаш со намрсени раце. Повторно се покрива и се остава да стаса 1–2 часа.
- Откако стасало тестото, уште еднаш се става на намрсена површина и се дели на 6 еднакви дела, но не се премесува.
- Се сукаат ленти за плетенка со намрсени раце, но нежно, не се притиска многу.
- Може да се стави киснето суво грозје, брусница или било што по ваша желба.
- Се ставаат плетенките во намрсен калап и се оставаат да киснат повторно.
- Се премачкуваат со жолчка и млеко и се печат во загреана рерна на 160°C околу 30 минути. Не смее да се препече, бидејќи козињакот ќе биде сув.
- Правила за козињак богат со конци: киснењето е многу битно – мора да се кисне подолго време бидејќи содржи поголема количина шеќер.
Ако и вие сте љубител на готвењето и сакате да споделите рецепт со нашите читатели, пишете ни на Оваа е-адреса е заштитена од спамботови. Треба да ви е овозможено JavaScript за да ја видите.
M. M. | Црнобело
Би можело да ве интересира:
Препорачуваме
Најчитани неделава
