Во кујна со Стефан Спирковски - Рецепт за здрави и брзи јапонски палачинки

Рецептите кои ги подготвува Стефан се со малку калории, лесни за подготовка и здрава верзија на некои од вашите омилени јадења. Овој пат тој подготви јапонски палачинки - румени однадвор, воздушестви и меки внатре и навистина вкусни.

Македонскиот фитнес инфлуенсер и модел, Стефан Спирковски, со своите следбеници на Инстаграм често споделува рецепти кои самиот ги подготвува.

Стефан е познат како човек кој се грижи за своето здравје и скоро секогаш се храни здраво.

Токму затоа и рецептите кои ги преферира се со малку калории, здрави, лесни за подготовка, а може да ги јадат сите - без оглед дали се на диета, сопствен режим на исхрана или сакаат да пробаат поздрава верзија на своето омилено јадење.

Овој пат Стефан подготви јапонски палачинки од само неколку состојки, а кои, истовремено се и вкусни и нискокалорични.

Потребни состојки:

• 5 јајца
• Прстофат сол
• Мед или агаве (количина по вкус)
• Малку цимет
• ½ ќесичка прашок за пециво
• Малку течен засладувач (без калории)

Начин на подготовка:

• Најпрво ги одвојуваме белките од жолчките во два длабоки сада.
• Во жолчките ставаме малку сол, малку мед (или агаве) и цимет, па со виљушка убаво ја соединуваме смесата.
• Во другиот сад, ги матиме белките додека не станат цврсти.
• Потоа додаваме половина пакетче прашок за печиво и малку течен засладувач без калории.
• Белките ги ставаме во садот со жолчките, па ги спојуваме двете смеси со лажица (не со миксер) за да се добие воздушната текстура.
• Палачинките се пржат во загреано тавче на средна температура (премачкано со малку масло).
• Ставаме од смесата, па ги поклопуваме палачинките со капак.
• Ги печеме додека не пораснат и заруменат од двете страни, а во средината да останат меки и бели.
• Пред послужување може врз нив да ставиме малку мед.

Видео постапка:

А. Ј. | Црнобело