„Не постои противотров за него“ – Турист во Грција почина откако беше каснат од кафеав пајак

Детали

петок, 09 август 2024

Местото каде што ве каснал кафеав пајак најчесто наликува на место зафатено со гангрена, а лицето трпи огромни болки. Со вакви симптоми во болница во Грција бил примен 48-годишен грчки турист кој ненадејно почина откако бил каснат од отровен инсект.

Сите грчки медиуми ја пренесуваат веста за смртта на 48-годишниот турист во Пиргос, Пелопонез во Грција, откако претходно бил каснат од отровен кафеав пајак.

Според официјалните информации, човекот, кој е со потекло од Фиотида, Грција, најверојатно бил каснат во неделата (04.08) додека бил на одмор во местото Илијас, во близина на Пиргос.

Првично не почувствувал никакви болки, но во вторникот веќе бил во посета на приватен ортопед, кој потоа го упатил во болница во Пиргос.

Иако првично, неговата состојба не изгледала загрижувачка, во средата (07.08) неговата здравствена состојба почнала брзо да се влошува.

Според лекарите, симптомите коишто тој ги покажувал укажувале на тоа дека е каснат од кафеав отровен пајак.

Тие вложиле натчовечки напори да го спасат, но за жал, не успеале.

„Не постои противотров и вообичаено симптомите брзо се развиваат. Вообичаено веднаш не се појавуваат симптоми, па пациентот не е свесен дека бил каснат, а дури по 72 часа следува брзо влошување на состојбата“ – вели директорката на болницата во Пиргос, Ангелики Сарантопулу.

Инаку кафеавите пајаци се едни од ретките отровни пајаци што може да се најдат во Европа. Освен нив, опасни се и пајаците „црна вдовица“.

Специјалистот за инфективни болести Димитрис Хатцигеоргу во изјава за грчките медиуми појасни дека каснувањата од пајаци ретко се со фатални последици, но проблемот настанува кога пациентот долго време не е свесен дека бил каснат од пајак.

„Најголемата опасност се јавува затоа што најверојатно нема веднаш да обрнете внимание, затоа што болката нема да биде толку силна на почетокот.

Потоа отровот од пајакот оди во крвта и предизвикува симптоми како треска, потење, па дури и белодробен едем или огромен пад на крвниот притисок, по што следува смрт“ – појаснува докторот.

Според него, најмногу треба да се внимава на децата, а како превентивна мерка наведува никогаш рацете или стапалата да не ги ставаме на места каде што не можеме да видиме или да бидеме сигурни дека е можно да се крие кафеав пајак.

Кафеавите пајаци обично достигнуваат големина од 1,2cm, а нивниот отров предизвикува оштетување на кожата кое наликува на гангрена.

Кога се повозрасни овие пајаци се со темно кафеава боја, а препознатливи се по тоа што имаат шест очи, наместо осум како голем број други пајаци.

Стомакот и нозете обично му се прекриени со влакненца.

Сакаат да живеат на темни места, па многу често може да се најдат на таваните, или во кутии и предели од домот што долго време не се користат.  

Ако забележите дека сте каснати, најдобро е местото веднаш да го измиете со вода и сапун, да му ставите мраз во крпа и да држите 10-тина минути откако сте биле каснати, а колку е можно побрзо треба да се упатите во најблиската болница.

Б. С. Б. | Црнобело / фото: depositphotos.com