„Скриениот скапоцен камен на Европа“: Според британскиот „Mirror“, Македонија е топ дестинација за 2024-та

Детали

четврток, 07 декември 2023

„Кога е во прашање туристичката посета на Европа, лесно можете да паднете во секојдневната стапица и да изберете некој од најпознатите градови на континентот. Но, ако барате дестинација која не е толку многу истражена и каде што сè уште не е преплавено со туристите од цел свет, тогаш вашиот избор треба да е Македонија“, пишува во колумна на британски медиум според која Македонија е најдобрата дестинација за 2024-та.

Лизи Томпсон, заменик уредник за лајфстајл во реномираниот британски весник Mirror, ја нарече Македонија „Скриениот скапоцен камен на Европа“.

Во онлајн изданието на магазинот, таа пишува дека мора да се посети Македонија, која е топ дестинација за 2024-та година.

Таа има пофалби за Охрид, но овој пат во фокусот на нејзината статија е Скопје како место што мора да се истражи, а нуди одлична забава по пристапни цени.

Што пишува во нејзината статија?

„Кога е во прашање туристичката посета на Европа, лесно можете да паднете во секојдневната стапица и да изберете некој од најпознатите градови на континентот.

Но, ако барате дестинација која не е толку многу истражена и каде што сè уште не е преплавено со туристите од цел свет, тогаш вашиот избор треба да е Македонија, земја во источниот дел на Европа.

Оваа земја, која се наоѓа меѓу Србија, Грција, Албанија, Бугарија и Косово, е вистински скапоцен камен. Во 2019-та година земјата ја посетиле само 750.000 странски туристи, но нивниот број расте од година во година.

Но, неоткриениот шарм на земјата не е единствената работа што го заробува срцето на туристите. Напротив, тука се и пејзажите кои ги импресионираат посетителите.

Неодамна, на TripAdvisor извесен @jordanellie41, го опиша езерото Матка како 'најдоброто од природата'. Навистина огромна пофалба.

Но, јасно е дека Македонија станува трендинг и топ дестинација за 2024 година“.

Лизи пишува и дека побарала мислење од британски експерти за патување, кои го велат истото.

Според нејзината соговорничка, се зголемува бројот на резервации за патување во Македонија, а Скопје е на листата топ 10 трендинг дестинации.

„Во последниве 12 месеци постои зголемен тренд за патување во Македонија, а порастот на купените карти за авионски летови од Лондон до Скопје е за околу 10%.

Источна Европа е прекрасна, па не чуди што постои зголемен интерес за овие неистражени земји“.

Иако некои го опишуваат Скопје со зборовите „кич, претерано, лоша бруталистичка архитектура во комбинација со класичен стил и град со една од најголемите стари чаршии во светот“, градот малку потсетува на Лас Вегас, а малку на Истанбул.

„Иако е еден од најапсурдните градови во Европа, и покрај многуте мани, главниот град на Македонија е полн со изненадувања.

Плус, цените се многу пристапни и нема толку многу туристи.

Па, ако сакате да посетите забавно место без многу турканици, и тоа да ве чини околу 50 евра за повратен авионски билет, Скопје е вистинската дестинација за вас“, пишуваа таа.

А. Ј. | Црнобело / фото: С.Н