Денес се слави Лазарова сабота – Што се прави на овој ден?

Детали

сабота, 27 април 2024

Облечени во бели и невестински фустанчиња девојчињата во повеќе градови во Македонија утрово треба со лазарова песна да го одбележуваат празникот Лазарова сабота, кој секогаш се паѓа еден ден пред големиот христијански празник Цветници, а 8 дена пред Велигден.

Лазарова сабота, годинава паѓа на 27-ми април, а традиционално секоја година се слави точно осум дена пред големиот христијански празник Велигден.

Овој ден се одбележува во чест на тоа што Исус Христос го воскреснал Лазар 4 дена по неговата смрт, по што тој живеел уште 30 години.

Се верува дека ова христово чудо се случило точно шест дена пред предавството и убиството на Христос на голгота.

За овој празник се врзуваат голем број обичаи и празници, а на денешен ден именден слават Лазар, Лазе, но и сите имиња што се поврзани со имиња на билки, како Цветан, Цвета, Калина, Јагода...

Иако Лазарова сабота и Цветници се слават како два посебни дена, вистината е дека тие се тесно поврзани па затоа и имендените се слават истовремено.

Според старите обичаи и традиции, во пресрет на Лазарова сабота, домаќинките подготвувале благи колачи, т.н. Лазаринки кои по формата го симболизирале упокоениот Лазар.

фото: Бигорски манастир

Домаќинките ги носеле колачињата наутро во црква и по литургијата им ги раздавале на присутните.

Рецептот за приготвувањето на традиционалните колачиња, можете да го погледнете ТУКА.

Исто така, според традицијата денес се берат врбови гранчиња и цвеќиња. Врбовите гранчиња се носат во црква и им се раздаваат на верниците.

Според други верувања пак, свежото цвеќе што денес ќе се набере треба да се остави да преноќи во чаша вода и со таа вода сите во домот следниот ден да се измијат за здравје, среќа и благосостојба.

Исто така, на денешен ден во минатото било традиција немажените млади девојки да се облечат во најубавата облека и да одат од куќа до куќа и да пеат лазарови песни, а домаќините од куќата ги даруваат со дарови.

Оваа традиција и ден-денес е зачувана во голем број македонски градови, но често наместо млади и немажени девојки, лазарските песни ги пеат мали девојчиња облечени во бели и невестински фустанчиња, а како подарок добиваат пари, шноли и други украси за девојчиња.

Б. С. Б. | Црнобело/ фото: depositphotos.com