Денес е летен Свети Никола – Обичаи и верувања поврзани со овој празник

Детали

среда, 22 мај 2024

Во минатото, на денешен ден рибарите не влегувале во езерата, а се верувало дека ако некој се најде во водите, ќе остане заглавен во водата за да празнува. Кои верувања се врзуваат за празникот Летен Свети Никола?

Денес (22.05) православните верници го слават празникот Пренос на моштите на свети Николај, чудотворец Мириклиски, или во народот познат како летен Свети Никола.

Иако календарски не се паѓа во летниот период, заради убавото време што обично преовладува во овој период, во народот е познат како „летен“.

Обично многу повеќе се слави зимскиот Свети Никола, кој секогаш паѓа на 19-ти декември, но денес Православната Црква го одбележува денот кога неговите мошти биле пренесени од Мира Ликиска во градот Бари во Италија.

Со цел да се заштитат моштите од нападите на муслиманите во Ликија (која се наоѓа во Анадолија), во 1087 година било одлучено тие да бидат пренесени во јужните делови на Италија во Бари, каде сѐ уште било присутно православното христијанство.

На тој долг пат биле забележани повеќе чуда, при допирот на моштите, но и при допирот на мирото што излегувало од нив. Се верува дека голем број болни биле исцелени, а за неколку дена оздравеле над сто болни од различни болести.

По три години од пренесувањето на моштите во црквата „Свети Јован“, била изградена нова црква „Свети Николај - Чудотворец“, каде биле пренесени неговите свети останки.

Постои верувањето дека Свети Никола му помогнал на слепиот српски крал Стефан Дечански да го поврати видот, па овој во знак на благодарност го накитил новиот храм со сребро и испраќал богати прилози за неговото опремување.

Кај нас се верувало дека овој ден се слави со цел да ги заштити луѓето од секакви неприлики, а со оглед на тоа што Свети Никола е запаметен како господар на водите и на морињата, најмногу се празнувал за да ги заштити луѓето од поплави и дождови.

Во почит на овој празник, во  минатото, рибарите не влегувале во чуновите во Дојранското Езеро, а во Охрид се верувало дека кој и да се најде во водите, тој ден ќе остане заглавен таму, за да празнува.

Во календарот на Православната Црква овој ден е одбележан со црни букви, односно се верува дека на денешен ден треба да се воздржите од тешки физички работи, а домаќинките не треба да перат, да чистат и да вршат други тешки работи во домот.

Б. С. Б. | Црнобело