Славчо Попоски, метеоролог: „Временски непогоди и можност за поплави во првата седмица од јули“

Детали

среда, 26 јуни 2024

„Во јули продолжуваат временските непогоди, а ќе биде и многу посвежо“, вели метеорологот Славчо Попоски.

Некако го преживеавме топлотниот бран во јуни, но според анализите на метеоролозите, следниот месец ни носи други температурни екстреми.

Имено, во првата седмица од јули ќе има услови за временски непогоди и поројни дождови, кои на некои места може да предизвикаат и поплави.

Во продолжение, прогнозата на Славчо Попоски:

„Екстремно високите температури кои ги имавме во текот на овој месец, по сè изгледа ќе ги 'наплатиме' со многу посвежо време и со потпросечни температури на воздухот во месец јули.

Во првата седмица од месец јули на Балканот, вклучувајќи ја и нашата Македонија, температурите ќе бидат многу пониски и потпросечни. Тоа значи - доколку планирате одмор некаде во соседството да го откажете барем, отсега гледано, во првата половина од јули.

Врнежите и во првата седмица од јули ќе бидат многу чести во регионот и во Македонија. Поради ова, очекуваме и нови временски непогоди, а не се исклучува можноста и за локални поројни поплави.

Во ваква ситуација, поради очекуваните ниски температури за месец јули, во алпскиот регион очекуваме и нови обилни врнежи од снег, а снегот би можел да се појави дури и на највисоките планини во Словенија.

Спирова С. | Црнобело

фото: Фејсбук, freepik.com