Нашата Нела пречекана како победник на училиште по Јуниор Евросонг - аплауз и прегратки од соучениците (видео)

Детали

понеделник, 15 декември 2025

„Од срце ви благодарам за овој прекрасен, топол и незаборавен дочек драги мои соученици. Вашата љубов, насмевки и прегратки ми покажаа дека Miracle не е само песна“, напиша нашата Нела, која заврши на седмото место на Јуниор Евросонг 2025.

Нела Манческа, која ја претставуваше Македонија на Јуниор Евросонг во Тбилиси, Грузија, си дојде дома и веќе се врати во училишните клупи.

Откако испеа како ангел, со нежен, а моќен настап, Нела ја освои не само македонската публика, туку и публиката ширум Европа, но и жирито, па заврши на одличното 7 место.

Сепак, на училиште Нела беше пречекана како победник од своите соученици, кои стоеја во ходникот и на школските скали и аплаудираа, ја гушкаа, се радуваа за неа.

А Нела, објави видео од пречекот на својот Инстаграм.

„Од срце ви благодарам за овој прекрасен, топол и незаборавен дочек драги мои соученици.

Вашата љубов, насмевки и прегратки ми покажаа дека Miracle не е само песна - туку чувство, поддршка и самодоверба што ја носам со себе.

Огромна благодарност и до моето училиште ООУ „Вера Циривири-Трена“, кое уште од самиот почеток беше моја сила, моја потпора и дел од моето чудо.

Со вас зад мене, сонот стана реалност, а чекорот кон Јуниорски Евросонг 2025 - уште посилен.

Ве сакам сите бескрајно. Ова е нашиот Miracle“ - напиша Нела на Инстаграм.

Кликнете за да го погледнете видеото од нејзиниот пречек:

Прочитајте и Нашата Нела Манческа „растури“ со изведбата на Јуниор Евросонг 2025 – погледнете го настапот и гласајте за нашата самовила (видео)

 А. Ј. | Црнобело