Бебе лемурче, моменти со новородено мајмунче – Што се случува деновиве во Скопје ЗОО? (фото)

Детали

петок, 23 април 2021

„Не не сакам во градинка, сакам во зоолошка!“ - ова е реченицата со која што практично ни почнува секое утро во последниве две недели. Ќерка ми (3) нема утро а да не побара да ја однесеме да ги види животните. Тоа барање е сосема логично, ако се земе предвид дека Зоолошката градина е местото што сите нѐ исполнува со позитивна енергија и нè тера да се вратиме повторно следниот викенд.

Како и да е, иако деновиве времето не е погодно за прошетки, па и за посета на Зоолошката градина, оттаму слушаме убави вести, што во секој случај се само иницијатива плус, следното слободно време кога времето ќе биде убаво, да го поминеме заедно со животните.

На официјалната Фејсбук страна на Скопската Зоолошка градина во текот на изминатите денови објавија дека имаат принова во семејството Патаси.

Тие објавија фотографија на која што се гледа како мајката од фамилијата „гусарски мајмуни“ во мир и тишина ужива во првите мигови со своето малечко.

Принова имаше и кај лемурите. На 11.04.2021 се роди бебе лемурче, а на Фејсбук од Зоолошката напишаа:

„Неделна радост во Скопје Зоо - Имаме бебе лемур. Прстенопашестите лемури се загрозен вид и во природата се останати само околу 2200-2400 лемури. Нашата зоолошка е една од ретките каде што секоја година се раѓаат по неколку лемурчиња и со тоа работиме на продолжување на видот. Колку за споредба, минатата година се роди едно лемурче по подолго време во зоолошката во Москва и тоа беше сензација со месеци низ цела Русија“.

Во Скопската зоолошка градина принова има и кај гуските, на фотографијата објавена на 15-ти месецов може да видиме како цело стадо гуски деноноќно се грижи за малите пилиња.

Претходно принова имаше и кај верверичките, а на Фејсбук од Зоолошка напишаа: „Мама Рипко излезе од куќарката за да ни ги покаже бебињата“.

Дополнително, од неодамна беше отворена и новата сезона во „Бејби Зоо“ каде најмалите посетители можат да погалат животно.

Овие вести се само иницијатива кога времето ќе биде убаво да одвоиме време и да го поминеме денот во Скопската Зоолошка градина. Тоа е местото што сите нѐ исполнува со позитивна енергија како повозрасните, така и најмалите.

Јас искрено, со нетрпение очекувам да го поминам денот таму и да ги посетам омилените животни.

Ќе се наполнам со позитивна енергија, а со помош на ќерка ми, повторно ќе се присетам како е да си дете и допрва да учиш за светот околу себе.

Б. С. Б. | Црнобело / фото: Фејсбук