Следете во живо - Пречек на македонската гордост Дејан Георгиевски од Олимписките игри

Детали

четврток, 29 јули 2021

Ни донесе сребро вредно како злато. Повеќе граѓани се собраа да ја пречекаат македонската гордост Дејан Георгиевски кој по 21 година ѝ донесе олимписки медал на Македонија.

По повод пристигнувањето на македонскиот вицешампион во теквондо во категоријата до 80 килограми денес се одржува свечена манифестација на плоштадот Македонија.

Фото: Twitter

Дејан Георгиевски заедно со неговите тренери Борче Костовски и Дарко Костовски денес попладнево пристигна на аеродромот во Скопје каде беа пречекани од поголема група сограѓани кои побрзаа први да честитаат за победата.

Инаку, Дејан Георгиевски е нашиот најуспешен олимписки спортист досега. Тој е вториот спортист што освоил медал на Олимписките игри од осамостојувањето па наваму.

Фото: Twitter

Свечената манифестација следете ја TУКА.

„Ветивме злато, а се вративме со сребро. Но, од Париз ветуваме дека ќе се вратиме со злато“ – порача македонскиот вицешампион во теквондо Дејан Георгиевски.

Голем број граѓани се собраа на плоштадот Македонија за да го пречекаат олимпиецот што ѝ донесе огромна радост на Македонија со победата во категоријата до 80 килограми. Дејан беше пречекан со овации од насобраната публика. Како што рече, особено е важно тоа што конечно е скршен мразот и Македонија почна да носи медали од Олимпијадите.

Тој ја искористи приликата за да им се заблагодари на тренерите Борче Костовски и Дарко Костовски, но и на членовите на неговото семејство, но и на клубските колеги, кои како што напомена деноноќно четири месеци тренирале заедно со него и се подготвувале за Олимписките игри. По завршувањето на офоцијалниот дел од пречекот голем број граѓани побрзаа да се фотографираат со Дејан.