Згрозувачки коментари на вести за силувања - тажната реалност во Македонија

Детали

среда, 01 декември 2021

„Охриѓанка силувана од својот партнер“ - „Како може да е силувана од партнер?“, „Велешанка претепана и силувана“ - „Биди поштена, никој не те тепа“, вака и уште посурово се коментира под објавите за силувања во Македонија. Крајно згрозувачки, за секоја осуда! Како може некој да размислува вака?

Секојдневно во медиумите осамнуваат вести за силувања кои се случиле во светот, но и во Македонија. Морничаво, згрозувачко, мора да се санкционира на најстрог можен начин!

Постои правен систем за тоа и државата ќе се избори за правата на жртвите.

Но, она што дополнително ме згрозува и ме ежи и ме тера да се прашувам какви луѓе постојат, се оние кои во коментари на социјалните мрежи ги поддржуваат насилниците и ги омаловажуваат жртвите.

Оние кои без грам срам пишуваат мизерни работи под вестите за силувања и наместо да бараат правда за жртвите, тие кај нив ја наоѓаат вината.

Во стилот „Сама си го барала“ коментираат без ронка срам. Но, дали ќе имаат ист таков дрзок и бесчувствителен став ако станува збор за нивната мајка, сестра, сопруга? Дали тогаш ќе сметаа дека жртвата е виновникот?

Апсолутно никогаш на ниту еден начин ниту една жена на светот не може да биде виновна за тоа што е силувана.

На овие жени кои собрале храброст да проговорат за тоа што им се случило и да побараат правда, треба да им бидеме комплетна поддршка, да им кажеме дека им се восхитуваме за храброста, за тоа што го обелодениле злосторникот и за тоа што се борат тоа да не ѝ се случи на некоја друга жена.

Медуза е непрофитен онлајн медиум, чии содржини ги создаваат група на ентузијасти и ентузијастки за заштита на правата на разни групи граѓани, и медиум кој отвора болни теми како оваа.

Таму јавно објавија некои од најзгрозувачките коментари под вестите за силувања во Македонија, а објавата вирално се споделува на Фејсбук.

Во описот на скриншотите од вести од разни наши медиуми и од коментари на истите, од Медуза пишуваат:

„Ниедно кривично дело не покренува толкава лавина морализаторски оправдувања за сторителите и морализаторски обвинувања кон оштетените, како случаите на сексуално насилство.

Емотивниот одговор е молк, срам и чувство на вина меѓу жртвите и мотивираност, самодоверба чувство на контрола кај злосторниците.

Вистинската борба против насилството врз жените подразбира темелни и долгорочни промени, не само во законите, туку пред сè во начинот на кој го перципираме, промислуваме и реагираме на насилството.“

CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело