Млад чевлар од Скопје го изненади татко си: „Му ги реставрирав омилените патики за да му ја вратам насмевката“

Детали

четврток, 30 декември 2021

„Синко овие ми се најудобните патики што сум ги носел некогаш, подарок ми се од тебе, но по 4 години ги уништив. Со нив работев секаква работа затоа што во нив најудобно се чувствував...“, му кажал 68-годишниот татко на Филип и тој не можел, а да не го изненади.

Филип Костовски е 32-годишен скопјанец кој повеќе од една деценија се занимава со чевларскиот занает и сега со помош на својот талент за поправка на чевли го изненади на навистина емотивен начин својот татко Бранко (68).

Филип вели дека одлучил да ги реставрира омилените чевли на неговиот татко, кој ги носи кога работи секаков тип на физичка работа.

Кога има млади луѓе што си ја сакаат професијата, а пред сѐ своите родители, тогаш има и вакви емотивни потези. Браво Филип!

За CRNOBELO.com Филип споделува како ја смислил оваа идеја:

„Еве ги татко, твоите омилени чевли се пак нови...“, му кажав кога сѐ беше готово. Како што имам изненадено многу луѓе со моите поправки на чевли, овојпат решив да го изненадам мојот татко.

„Синко овие ми се најудобните патики што сум ги носел некогаш, подарок ми се од тебе, но по 4 години ги уништив. Со нив работев секаква работа затоа што во нив најудобно се чувствував, ако најдеш каде се продаваат пак земи ми јас ќе ти дадам пари“, ми рече татко ми.

Јас ги барав секаде, но ги немаше веќе како модел, сите беа слични, но не беа такви.

Се решив како чевлар јас да ги реставрирам од почеток комплет. Па, како што работеше со нив само му реков дај ми ги на неколку дена да побарам исти такви (но не му кажав дека ќе ги реставрирам).

Почнав со хемиско чистење, па отпарување на мрежата, јазиците и сѐ останато, потоа се ставаа нови парчиња, па фарбање, па лак и сѐ останато по ред...

На крај излегоа совршено, буквално како нови и вратени пак во живот. За крај како подарок за новата година ги спакував и му ги дадов, ги отвори, ги виде и пријатно се изненади и во неверување зачудено ме праша: „Што направи дали овие се истите?“

„Да, јас лично ги реставрирав за да ти ја вратам насмевката. Ако сакаш да ги носиш уште 4 години, цени го мојот труд и веќе со нив да не работиш тешка физичка работа“.

Видео од изненадувањето на Филип и процесот на реставрација:

© CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело