Спасени животни, бројни хумани гестови: Убави и забавни моменти во Македонија по кои ќе ја помниме 2022 година

Јове од Битола спаси куна која била речиси мртва кога ја пронашол негов пријател. Јове решил да не дозволи да умре – ја однел на ветеринар ја хранел со цуцла и ѝ давал витамини – па сега таа е негово милениче.

Ова не е единствената топла приказна за повредено животно кое било спасено од хумани луѓе. Кучето Локумче било најдено во скопско село со многу лоша состојба на очите, а на крај и ги изгуби. Но, сега Локумче има ново семејство и топол дом во Германија.

Од инспиративните приказни што ги слушнавме годинава, дефинитивно се истакнува Србинот Алекса Петровиќ кој со инвалидска количка беше дел од овогодишниот охридски маратон „Охрид трчат“.

Исто така, мора да ја спомнеме и 79-годишната баба Милка која се качи на Бислимската Клисура, и тоа со вештачки колк.

Детскиот цртеж за изгубеното маче Маза Попова ни ги стопли срцата и ја покажа искрената детска љубов кон милениците. Не е познато дали Маза е најдена и искрено се надеваме дека детенцето повторно е со својот миленик.

Во Македонија беше изведена првата трансплантација на црн дроб од починат дарител - 60-годишен пациент со хронична болест на црниот дроб доби здрав орган.

Спирова С. | Црнобело