Еко-порака од редакцијата на CRNOBELO.com: Селективно одложувајте го отпадот

Детали

четврток, 09 февруари 2023

Дали сте од оние кои никогаш не фрлиле хартивче на улица? А, кога ќе забележите дека тоа да го прави некој друг, дали ве исполнува гнев? Непоправливи екологисти во душа!

Она што е заедничко за сите колеги во нашата редакција е дека сите сакаме да живееме во чист град, во здрава и еколошка животна средина. Но, не само што постои желба, туку и се трудиме еколошки да се однесуваме.

За почеток, направивме промена од нас и сега селективно го одложуваме отпадот. Во нашата редакција има различни кутии - посебна за пластика, посебна за хартија и посебна за останатиот амбалажен отпад.

Се трудиме пластичниот и хартиениот отпад да не заврши на депонии кои имаат ограничен капацитет, каде отпадот скапува и ги загадува водата, воздухот и почвата, што севкупно влијае негативно на животната средина во која живееме, на храната што ја јадеме, на водата што ја пиеме.

Затоа селектираме, а кога ќе се соберат доволно пластични шишиња и лименки, ги одложуваме во некоја од поставените Вендинг машини.

За хартијата се јавуваме во Пакомак, кои доаѓаат да ја испразнат кутијата - толку е едноставно.

Како редакција, се решивме на еколошко однесување, и тоа го почитуваме. Но, надвор од нашите канцеларии сè уште има работи кои многу ни пречат.

Расфрланото ѓубре! Фактот дека неговото одложување е на несоодветни места. Фактичка ситуација којашто е одраз на нашата (не)грижа и недостаток на љубов кон местото во коешто живееме.

Дали и дома вака фрламе ѓубре, каде што ќе ни текне? Повеќето луѓе ќе речат дека нема доволно корпи и контејнери во нивна близина.

И веројатно се во право и ни се потребни повеќе канти кои нема да бидат уништени, но сепак тоа не е доволно оправдување за да се фрли ѓубрето на земја. 

Отпадот мора да го одложуваме на соодветното место (корпа, контејнер), па макар и да треба отпадот да го носиме подалеку додека да најдеме каде да го фрлиме. 

А, денес како опција за одложување на отпадот ги имаме и повратните Вендинг машини на Пакомак.

Ако оставиме пластичните шишиња и алуминиумските лименки да се депонираат на депонија, ризикуваме дополнително загадување на животната средина, а доколку се соберат со вендинг машините, тие можат да генерираат приход за секој поединец и бенефити за самата општина.

Да се однесуваме одговорно, еколошки, бидејќи Земјата е една и немаме друга алтернатива…

Заедно да бидеме промената што сакаме да ја видиме во општеството и да изградиме подобра и почиста иднина за нас и за нашите деца.