Клои Кардашијан за синот од сурогат мајка: „Се чувствував виновно затоа што друга жена го роди моето бебе“

Детали

четврток, 25 мај 2023

„Целото искуство наликуваше на трансакција. Имав грижа на совест затоа што тешко се поврзав со синот“ – Клои Кардашијан отворено зборува за нејзиното искуство со сурогат мајчинството и вели дека не очекувала дека тоа толку многу ќе се разликува од искуството кога ја доби ќерката Тру.

Иако сурогат мајчинството е мошне популарно кај славните и богатите, Клои Кардашијан (38) одлучи отворено да зборува за нејзиното искуство со второто дете, кое го доби со сурогат мајка.

Второто бебе таа го доби со бившиот партнер, кошаркарот Тристан Томпсон, среде скандалите со неверствата, но сега отворено говореше за тоа какво е чувството за една мајка кога не го носела сопственото бебе, туку најмила сурогат мајка.

Во најновата епизода на нивното реално шоу, The Kardashians, Клои разговара со нејзината сестра Ким и со поранешниот партнер на сестра ѝ Кортни, Скот Дисик за искуството од раѓањето на синот Тејтум, кој го доби во јули минатата година, неколку месеци откако се дозна дека тој доби уште едно дете од аферата со Марали Николс.

Во епизодата Ким која доби две деца преку сурогат мајчинство, отворено разговара со својата сестра за целото искуство, а Клои признава дека работите не се толку идеални како што изгледаат на прв поглед.

„Како некој да си поигрува со мојот мозок. Навистина е чудно. Верувам дека постои разлика кога бебето е во твојот стомак и го чувствува твоето срце. Не постои друг на светот што може да те почувствува така одвнатре на тој начин“ – вели Ким и ја прашува сестра ѝ дали сега се чувствува помалку поврзано со нејзиниот син.

Клои признава дека чувствува грижа на совеста затоа што многу тешко ѝ оди поврзувањето со синот.

„Дефинитивно ја закопав главата во песок за време на таа бременост и не бев свесна што се случува. Дури откако отидов во болница да го земам бебето, мислам дека дури тогаш регистрирав што навистина ми се случува“ – вели таа.

Клои го опишува отворено целото искуство и вели дека не се чувствувала сигурно во мигот кога станала мајка по вторпат.

„Дефинитивно бев во шок од целото искуство. Се чувствував виновно затоа што жената го роди моето бебе, а потоа јас и бебето заминавме во другата соба и ги разделивме. Чувството наликуваше на обична трансакција“ – вели Клои.

Таа напоменува дека би сакала повеќе да биде информирана за сурогат мајчинството пред да се одлучи на таков чекор.

Инаку, Клои од врската со Тристан ја има и ќерката Тру (5), а откако во 2021-ва година ѝ соопштија дека следната бременост би можела да биде со висок ризик, таа и Тристан се одлучија второто дете да го добијат со сурогат мајка.

Прочитајте и „Ја изневери бремена, не се грижи за синот“ – Клои Кардашијан критикувана откако го пофали Тристан Томпсон дека е најдобар татко

Б. С. Б. | Црнобело