Ева Мендез се откажа од кариерата за да биде домаќинка: „Среќна сум што имам можност да бидам со децата“

Детали

среда, 27 март 2024

„Не глумев затоа што глумењето те оддалечува од домот“ – Ева Мендез открива зошто на врвот на својата холивудска кариера одлучи да се откаже од филмовите и наместо тоа да стане посветена мајка и домаќинка, која го поддржува својот славен сопруг Рајан Гослинг.

Ева Мендез, пред да го започне заедничкиот живот со актерот Рајан Гослинг, имаше блескава холивудска кариера, но во последните 10 години таа нема играно во ниту еден филм, а нејзин главен приоритет се ќерките Есмералда (9) и Амада (7).

Освен што не игра во филмови, Ева не се појавува ниту на црвениот тепих заедно со својот сопруг, па така таа не присуствуваше ниту годинава на доделувањето на Оскарите, а по неговата изведба на сцената, таа на Инстаграм се пошегува и му упати порака:

„Изгледаш како Кен на Оскарите, Рајан Гослинг. Сега дојди си дома, треба да ги легнеме децата да спијат“.

Многумина беа разочарани што една од најубавите жени во Холивуд одлучи да се повлече од јавноста, но таа вели дека е пресреќна што е домаќинка и што не работи.

Ева гостуваше во Today Show, каде освен на други теми, зборуваше и за тоа како од холивудска мегаѕвезда станала домаќинка и мајка.

„Тоа беше како невербален договор и како да си реков: ‘Во ред, тој ќе работи и јас ќе работам. Само јас ќе работам дома’“ – вели актерката.

На прашањето како се чувствува заради тоа што има можност да седи дома со децата додека нејзиниот сопруг работи, таа само вели: „Среќна сум“.

Ева открива дека иако 10 години не се појавила на филмското платно, тоа не значи дека немала кариера, но се воздржувала од снимањето филмови.

„Сѐ уште работев, но не глумев затоа што глумењето и снимањето на различни локации те оддалечува од домот“ – сподели таа.

За потсетување, Ева и Рајан се запознаа во 2012-та година кога заедно работеа на филмот The Place Beyond the Pines, а Ева вели дека Рајан е целосно посветен на својата работа.

За неговиот настап на Оскарите, Ева накратко вели:

„Тој отиде и си ја заврши својата работа. Тој е многу добар во тоа што го работи, го заврши и си дојде дома. Затоа што тоа е најважно. Одиш, си ја завршуваш работата најдобро што можеш и си доаѓаш дома“.

За љубовната приказна на Ева и Рајан, прочитајте повеќе ТУКА.

Б. С. Б. | Црнобело