Елизабета ја слави 70-тата годишнина на тронот – изјави дека Камила сепак ќе биде кралица кога Чарлс ќе стане крал

Детали

недела, 06 февруари 2022

Во официјалната изјава по повод 70-тата годишнина на тронот, кралицата Елизабета откри дека Камила ќе ја добие титулата „кралица“ кога принцот Чарлс ќе го наследи престолот.

Денес, 6-ти февруари, кралицата Елизабета ја слави 70-тата годишнина на тронот. Во официјалната изјава по повод јубилејот, кралицата му се заблагодари на нејзиниот народ за поддршката, но и сподели дека откако Чарлс ќе стане крал, неговата сопруга ќе ја добие титулата „кралица“.

Сè досега постоеја секакви шпекулации за тоа која титула ќе ја добие Камила откако принцот Чарлс ќе седне на тронот и иако дел од јавноста очекуваше и таа да стане кралица, изјавата на Елизабета сепак беше изненадување за многумина.

„Засекогаш ќе бидам благодарна за целата ваша поддршка. И, кога ќе дојде време и мојот син Чарлс ќе стане крал, знам дека нему и на неговата сопруга Камила ќе им ја дадете истата поддршка што ми ја давате и мене. И, моја искрена желба е дека кога ќе дојде време, Камила ќе биде кралица сопруга и ќе продолжи со нејзината лојална служба“, гласи дел од изјавата на Елизабета.

Титулата „кралица сопруга“ значи дека војвотката од Корнвол ќе биде нарекувана „кралицата Камила“ штом Чарлс ќе седне на тронот. Ова е титулата што требаше да ја добие принцезата Дијана доколку не се разделеше од Чарлс пред нејзината трагична смрт.

Според изворите, и Чарлс и Камила биле трогнати од зборовите на кралицата.

Врската на Чарлс и Камила предизвикуваше многу контроверзии, најмногу бидејќи голем дел од јавноста ја обвинува токму Камила за разделбата на принцот и Дијана.

Сепак, во 2005 година, кралицата им дозволи на Чарлс и Камила да стапат во брак.

Според извори блиски до кралското семејство, но и бројните изјави на самата кралица, Камила дефинитивно ја заслужува титулата бидејќи отсекогаш била посветена сопруга и ги извршувала сите кралски должности.

Според Daily Mail, јубилејот на кралицата ќе биде одбележан во интимна атмосфера и кралицата ќе им оддаде почит на нејзиниот татко – кралот Џорџ – и нејзиниот сопруг кој почина минатата година.

Елизабета го наследи нејзиниот татко, кралот Џорџ Шести, по неговата смрт на 6-ти февруари 1952 година.

Спирова С. | Црнобело