Најбезбедните и најопасните земји за 2022 година – Македонија е на подобра позиција од лани

Детали

среда, 22 јуни 2022

Поради конфликтот, Украина е земја која бележи најголем пад во однос на безбедноста, додека Македонија се искачила за една позиција за разлика од лани и сега се наоѓа на 36-тото место од 163 рангирани земји.

Vision of Humanity е невладина организација која секоја година изработува листа на која ги рангира државите според безбедноста.

Во извештајот познат како Global Peace Index се земаат предвид неколку фактори според кои се оценуваат државите и нивната безбедност.

Неодамна беше објавен извештајот за 2022 година и, според резултатите, Исланд важи за најбезбедна земја за живот. Всушност, Исланд се наоѓа на првото место уште од 2008 година.

Најопасна за живот е Авганистан, и тоа петта година по ред, а на дното на листатa се наоѓаат и Јемен, Сирија, Русија и Јужен Судан. Како што е наведено во извештајот, овие земји се едни од најнебезбедните не само во 2022-ра, туку и во претходните три години.

За оваа година земен е предвид и конфликтот во Украина, поради што оваа земја бележи можеби најголем пад кога станува збор за нејзината безбедност. Сега Украина се наоѓа на 153-тото место и бележи пад од 17 позиции.

Европа се смета за најмирниот континент во светот и овде се наоѓаат седум од десетте најбезбедни држави.

Резултатите покажале дека оваа година било забележано влошување на состојбата во 71 држава. Од друга страна, кај дури 90 земји било забележано подобрување, вклучувајќи ја и Македонија.

Од 163-те земји што се наоѓаат на листата, Македонија е на 36-тото место и оваа година се искачила за една позиција.

Од соседните држави, единствено Бугарија има подобар резултат од нас и се наоѓа на 24-тото место. Албанија се наоѓа на 41-вото, Грција на 53-тото, додека Србија на 52-рото место.

На следната страница 10-те најбезбедни и 10-те најопасни држави за 2022 година...