Морничаво видео: Прозорец на авион се скршил среде лет – патниците и екипажот се безбедни

Детали

петок, 26 август 2022

На вирално видео на ТикТок се гледа мигот кога во авион на висина од 3 километри се појавиле пукнатини на стаклото на едниот од прозорците. Иако видеото е морничаво, од авиокомпанијата уверуваат дека пукнатините се само на надворешен слој од прозорецот, а ова не ја загрозува безбедноста на патниците.

ТикТок корисник сподели морничаво видео од мигот кога се појавиле пукнатини на прозорецот од авионот со којшто летал.

Наводно, инцидентот се случил на 20 август, на лет од Варшава до Њујорк, во мигот кога авионот почнал да слетува. Кога пукнал прозорецот, авионот бил на висина од околу 3 километри.

На видеото се гледа како патниците кои седат до прозорецот избезумено стануваат од нивните седишта, а останатите патници се видно вознемирени.

Видеото е споделено на ТикТок пред два дена, а веќе има над четири милиони прегледи.

@degenerate.destroyer2 #crazy #lotairlines #poland #planes ♬ original sound - Tristan

Иако целата ситуација изгледа навистина страшно, речиси веднаш се огласи полската авиокомпанија која го организира летот.

Според авиокомпанијата, пукнатините се само на надворешниот слој од прозорецот кој го затемнува стаклото. Односно, самиот прозорец не бил скршен.

Авионот безбедно слетал, а прозорецот бил заменет.

„Овој прозорец не беше скршен. Прозорците имаат неколку слоеви. Пукнатините се на слојот кој служи за затемнување на прозорецот. Овој слој може да се оштети од физички контакт со остри и тешки предмети.

Како мерка на претпазливост, пилотот леташе пониско и безбедно слета на аеродромот во Њујорк“, гласи изјавата на авиокомпанијата.

Доколку навистина се скрши прозорец од авионот додека лета, последиците можат да бидат лоши. Причината е наглата промена на притисокот во кабината.

Откако ќе се скрши прозорецот, воздухот од кабината ќе почне да излегува низ него, а поради ова низ кабината ќе почнат да летаат сите помали предмети кои не се прицврстени.

Сепак, ако станува збор за само еден прозорец, доволно е патниците да седат смирено на нивните седишта, додека пилотот се обидува да го слета авионот.

Исто така, добро е да знаете дека во историјата на патувањето со авион, само трипати имало инциденти со целосно скршени прозорци. 

Во првите два лета (во 1990 и 2018 година), мал дел од патниците и екипажот биле повредени, но ништо сериозно.

За жал, на третиот лет, исто така од 2018 година, една патничка загинала бидејќи седела веднаш до прозорецот што се скршил.

Прозорците на авионите се мошне издржливи и летањето со авион се смета за еден од најбезбедните начини на транспорт.

Што значи, иако видеото со пукнатиот прозорец е вознемирувачко, не треба да се плашите дека ќе се најдете во таква ситуација бидејќи шансите се практично непостоечки.

Спирова С. | Црнобело