Зошто се појавува несоница по породувањето и како да се справите со неа?

Постпородилната несоница, или отежнато спиење по породувањето, е вообичаен проблем што го доживуваат многу нови мајки. Постојат неколку фактори кои можат да придонесат за овој проблем, вклучувајќи ги хормоналните промени и сите обврски околу бебето. 

За време на бременоста, телото произведува високо ниво на хормони како што се естроген и прогестерон, што може да влијае на режимот на спиење на жената. По породувањето, нивото на овие хормони брзо се намалува, што исто така може да го наруши сонот.

Дополнително, физичките непријатности од породувањето, како што е болката, може да го отежнат заспивањето.

Честото хранење и менувањето на пелените можат да го прекинат сонот, а стресот и вознемиреноста од адаптирањето на живот со новороденче, исто така, можат да го отежнат релаксирањето и заспивањето.

Како да се справите со несоница по породувањето?

Направете рутина за времето за спиење на вашето бебе

Постојаната рутина пред спиење им помага на бебињата да развијат добри навики за спиење, но рутината може да биде корисна и за родителите.

Затемнете ги светлата, облечете удобни пижами, слушајте тивка музика, медитирајте, читајте книга.

Откако ќе одите во кревет, одржувајте ја вашата спална соба темна и тивка. Чувајте го вашиот мобилен телефон и другите уреди подалеку од креветот, бидејќи светлината може да го наруши вашиот деноноќен ритам и да го отежне заспивањето.

Размислете за вашите навики во исхраната

Избегнувајте кофеин и чоколадо, кои можат да ве држат будни, особено ако ги консумирате доцна попладне или навечер. Големиот оброк пред спиење може да го има истиот ефект.

Одете во теретана или вежбајте дома, пешачете

Откако вашиот лекар ќе ви даде „зелено светло“, вратете се во рутината за вежбање.

Вежбањето може да ви помогне да се ослободите од стресот, па дури и да ја избегнете постпородилната депресија и, секако, да ви помогне да заспиете полесно.

Не останувајте будни откако ќе се погрижите за бебето

Кога вашето малечко ќе се разбуди ноќе - без разлика дали за хранење или промена на пелена - потрудете се да ја одржите посетата кратка. Направете што е потребно, а потоа веднаш вратете го во кревет.

Важно е да бидете свесни за тоа како вашата постпородилна несоница влијае на вас за да знаете дали е време да побарате лекарска помош.

Неможноста да заспиете е повеќе од само чувство на умор - тоа всушност може да биде штетно за вашето здравје.

Кои се ризиците од нетретирана несоница по породувањето?

Жените во постпородилниот период кои не спијат доволно имаат покачени нивоа на воспалителни хемикалии наречени цитокини и хормонот на стрес - кортизол, што го прави нивниот имунолошки систем ранлив, а со тоа и нивното целокупно здравје.

Уште повеќе, истражување од 2016 година покажало дека постпородилната несоница може да ја зголеми веројатноста за постпородилна депресија.

За жал, не постои единствен одговор за тоа колку долго ќе трае постпородилната несоница. Како и повеќето здравствени проблеми, тоа варира од личност до личност.

Според Office of Women's Health, краткотрајната несоница може да трае само неколку денови, а хроничната несоница може да трае 3 месецa или повеќе.

Време е да побарате лекарска помош кога проблемите со спиењето влијаат на дневната работа, можноста да останете будни за да се грижите за бебето, возењето или ако недостатокот на сон предизвикува анксиозност и/или депресија.

M. Г. | Црнобело / фото: freepik.com