6 лоши навики што веднаш треба да ги промените – го зголемуваат ризикот од мозочен удар

Не го регулирате високиот крвен притисок, постојано седите или лежите и ги прескокнувате лекарските прегледи.

Постојат разни фактори што го зголемуваат ризикот од мозочен удар.

Но, добрите вести се дека повеќето се во ваша контрола, па со промена на некои животни навики, можете значително да го намалите ризикот.

Шест работи што НЕ треба да ги правите за да го намалите ризикот од мозочен удар:

Да водите седентарен живот

Под седентарен живот се подразбира минимална физичка активност и минување најголем дел од времето во седење или лежење. И, ова негативно се одразува врз целокупното здравје.

Од друга страна, физичката активност го спречува затнувањето на крвните садови, со што значително се намалува ризикот од мозочен удар.

Ќе забележите разлика и со само 30-минутна физичка активност пет дена неделно. Притоа, не мора да одите во теретана, туку доволно е да одите на прошетка, да возите велосипед или да се занимавате со активности како јога.

Да го игнорирате високиот крвен притисок

Високиот крвен притисок кој не се третира може да води до низа проблеми. Всушност, ова е една од најчестите причини за мозочен удар.

Затоа, редовно следете го притисокот и ако ви е покачен, консултирајте се со лекар и слушајте ги неговите препораки.

Да ги прескокнувате проверките

Некогаш ризичните фактори не покажуваат симптоми. На пример, не можете да знаете дека имате висок холестерол ако не се проверите. А, високиот холестерол може да доведе до проблеми со здравјето, вклучително и мозочен удар.

Затоа, потрудете се барем еднаш годишно да направите детален преглед, па и почесто ако имате таква препорака од лекар. Не заборавајте дека секогаш е подобро да го спречите проблемот отколку потоа да го лекувате.

Да пиете многу алкохол

Сигурно сте свесни дека прекумерното пиење алкохол не е добро за вас – истражувањата покажале дека е поврзано со одредени видови рак, проблем со црниот дроб, па и мозочен удар.

Доколку од некоја причина лекарот ви препорачал и воопшто да не пиете, послушајте го.

Да ја занемарувате здравата исхрана

Голем дел од проблемите со здравјето потекнуваат од неправилната исхрана. Ако често јадете мрсна храна или храна со многу шеќер и сол, самите си го зголемувате ризикот од мозочен удар.

Не мора да следите некоја диета за да бидете здрави, туку фокусирајте се на тоа да внесувате повеќе овошје и зеленчук, а помалку мрсна и многу преработена храна.

Да ги запоставувате третманите по мозочен удар

Ако еднаш сте доживеале мозочен удар, никако немојте да ги одбивате терапиите и третманите бидејќи драстично ќе си го зголемите ризикот за втор.

Исто така, воведете ги сите промени во животните навики што ви ги препорачал лекарот.

Спирова С. | Црнобело