Знаци за деменција за кои не се зборува често (а треба да ги знаете)

Покрај проблемите со помнењето, знак за деменција можат да бидат и халуцинациите, како и чудното однесување.

Деменцијата не е болест, туку повеќе е како збор што опишува состојба на проблеми со сеќавањето, говорот, решавањето проблеми и другите когнитивни способности.

Односно, деменцијата е симптом што се јавува кај разни невродегенеративни заболувања, како Алцхајмерова болест.

Болестите групирани под зборот деменција се предизвикани од абнормални промени на мозокот кои се до толку напредни, што го отежнуваат секојдневното нормално функционирање.

Проблемите со сеќавањето се знак за деменција што го знаат сите, но постојат и други кои не се зборуваат често.

Знаци на деменција за кои треба д бидете свесни:

Халуцинации

Халуцинациите се нешто што го поврзуваме со шизофренија, но може да се јават и кај лица со деменција.

Обично овие халуцинации се визуелни и за личноста се премногу реални. Некогаш можат да бидат вознемирувачки, но некогаш неутрални, па дури и пријатни.

Халуцинациите можат да бидат и звучни, односно личноста да слуша звуци кои не постојат.

Чудно и неучтиво однесување

Луѓето со деменција може да почнат да се однесуваат чудно и поразлично од претходно, притоа игнорирајќи ги социјалните норми што ги почитувале.

Ова значи дека може да почнат да бидат неучтиви и агресивни дури и кон луѓето кои им се најблиски.

Овие постапки на лице со деменција можат да бидат и болни за неговите блиски, но важно е да се запомни дека не се намерни.

Деменцијата, за жал, има влијание врз мозокот, вклучувајќи ги деловите кои се одговорни за расудувањето и однесувањето.

Заборавање зборови

Проблемите во говорот се едни од поизразените симптоми на деменција, доста често во случај на прогресивна афазија.

Како што се нарушува функцијата на мозокот, се намалуваат и јазичните способности, па на личноста може да ѝ биде тешко да се присети на одредени зборови.

Ова, секако, ја отежнува комуникацијата и може да создаде фрустрација, па и постепено изолирање.

Проблеми со координација

Деменцијата не влијае само врз сеќавањето, туку може да ја наруши и координацијата.

Исто така, на луѓето со деменција може да им биде тешко да проценат растојание, но и да препознаат предмети, лица, места… Ова, пак, може да доведе до анксиозност и збунетост.

Тешкотии при извршување секојдневни обврски

Обврските кои ги правиме дури и автоматски можат да станат проблематични за лица со деменција.

Може да им биде тешко да се сетат на редоследот на активните како облекување, готвење или туширање.

Поради ова, по извесен период, лицата со деменција имаат потреба од негувател, дури и за најосновни работи.

Бидејќи деменцијата е знак за невродегенеративно заболување, не треба сами да поставувате дијагнози, ниту за себе ниту за некој друг.

Ако ги забележувате знаците или се сомневате дека станува збор за деменција, секогаш треба да се консултирате со лекар.

Спирова С. | Црнобело