6 навики со кои ќе ги регулирате хормоните (без лекови)

Сончевата светлина ги активира хормоните кои имаат влијание врз расположението и сонот, па важно е наутро да излезете надвор или барем да застанете на прозорец.

Хормоните имаат многу важна улога во организмот – ги регулираат главните телесни функции како метаболизам, расположение и спиење.

Ова значи дека кога настанува нерамнотежа на хормони во организмот, се појавуваат секакви симптоми.

Важно е да се нагласи дека вие самите не можете да си дијагностицирате хормонална нерамнотежа и не треба да пиете хормони на своја рака.

Само лекар може да утврди дали ви треба хормонална терапија и доколку почнете да пиете кога нема потреба, можете самите да си предизвикате нерамнотежа.

Но, од друга страна, некои навики можат да му помогнат на вашето тело подобро да ги регулира хормоните, и со тоа да го намалите ризикот од нерамнотежа.

Како да воспоставите хормонална рамнотежа, без лекови?

Вежбајте наутро

Кога сте во можност, вежбајте наутро, откако ќе станете за да го искористите високото ниво на кортизол и полесно да го издржите тренингот.

Покрај тоа, утринското вежбање помага во регулирањето на расположението бидејќи го поттикнува лачењето на ендорфини.

Внимателно испланирајте кога ќе јадете и кога ќе пиете кафе

Хормоните имаат влијание и врз апетитот, па добро би било да го имате ова предвид кога јадете.

Најдобро е да не јадете многу доцна навечер бидејќи вака ќе ги избегнете флуктуациите во нивото на шеќер во крвта и појавата на симптоми како раздразливост и замор.

Ако вечерате порано, исто така ќе го регулирате лачењето на грелинот – хормонот на глад – и лептинот – хормонот кој дава сигнал дека сте сити. На овој начин ќе имате поголема контрола над желбата за храна.

Кога е во прашање кафе, најдобро е да го пиете наутро или барем да не пиете после пладне.

Не прескокнувајте оброци

Прескокнувањето оброци нема да ви биде од корист бидејќи го забавува метаболизмот.

Ова значи дека со секој оброк телото може да складира повеќе масти отколку што треба.

Потрудете се да имате три оброци во текот на денот, а може да вклучите и здрави ужини како овошје или јаткасти плодови.

Исто така, не заборавајте да пиете доволно вода – хидратацијата е важна за контрола на апетитот бидејќи понекогаш мозокот може да ја протолкува жедта како глад.

Исклучете ги уредите со екрани пред спиење

Пробајте да не гледате телевизија или во телефон барем еден час пред спиење.

Со ова ќе помогнете да се зголеми нивото на мелатонин во организмот, па ќе спиете подобро.

Исто така, препорачливо е да си легнете помеѓу 22 и 23 часот бидејќи во овој период лачењето на мелатонин и другите слични хормони е природно зголемено.

Нивото на кортизол, од друга страна, е значително намалено, па ќе заспиете полесно.

Прегрнете ја саканата личност

Истражувањата покажале дека прегратка со сакана личност го зголемува лачењето на окситоцинот, со што се намалува стресот, се подобрува расположението, а се подобрува и квалитетот на сонот.

Наутро изложете се на сончева светлина

Сончевата светлина ги „активира“ хормоните кои имаат влијание врз расположението и сонот, па важно е наутро да излезете надвор, или барем на прозорец.

Исто така, нивото на кортизолот е највисоко во првиот час откако ќе се разбудите, па ова е идеално време да ги завршите најважните обврски.

Неговото ниво постепено се намалува во текот на денот, за навечер да можете да спиете.

Треба да се напомни и дека кортизолот не е „лош“ хормон, туку станува проблематичен кога се лачи премногу во организмот, најчесто од стрес.

Иако овие навики се корисни, доколку чувствувате некакви симптоми и сметате дека нешто не е во ред, консултирајте се со лекар. Во некои ситуации навистина е потребна терапија, па не ризикувајте.

Спирова С. | Црнобело