Неколку плажи во Шпанија се затворени поради бактерија што „јаде месо“: Колку е опасна за луѓето?

Некои видови од бактеријата вибрион може да предизвикаат сериозни инфекции, а во многу ретки случаи и инфекција што го уништува мекото ткиво. Неколку плажи во Шпанија се привремено затворени, а експертите велат дека присуството на бактеријата е резултат на загадувањето и климатските промени.

Веќе ги чувствуваме последиците од загадувањето на планетата и климатските промени, а сега се појави и нов проблем на Медитеранот, особено во Шпанија.

Летово веќе неколку плажи во Шпанија биле привремено затворени или ограничени бидејќи во водата е забележано присуство на бактерија од родот вибрион (Vibrio).

Ова се бактерии кои живеат во вода – некои видови во слатка, а некои во солена. Постојат дваесетина видови од овој род, а едниот од нив е и Vibrio cholerae – бактеријата одговорна за болеста колера.

Уште сега да нагласиме дека бактеријата што периодов е забележана во водите на Медитеранот не предизвикува колера, но сепак може да претставува опасност за луѓето.

Според климатските експерти, појавата на бактеријата се должи на зголемените температури.

„Сега Медитеранот ни покажува што значи кога температурите во светот ќе се зголемат (над просекот).

Државите што го делат ова море сепак можат да најдат решение“, вели за Euronews климатски експерт.

Бактериите од родот вибрион обично живеат во соленкаста (мешана) вода, особено во области каде што реките се влеваат во морињата.

Можат да се најдат во морска храна, а некои варијанти можат да предизвикаат симптоми кај луѓето доколку консумираат храна загадена со бактеријата.

Во Европа се забележани неколку видови на бактериите вибрион, од кои најистакнати се Vibrio vulnificus и Vibrio parahaemolyticus. Забележани се и неколку соеви на Vibrio cholerae (бактеријата што предизвикува колера).

Видовите кои се опасни за луѓето можат да предизвикаат проблеми доколку се консумираат (преку живо заразено месо) и ако морската вода дојде во контакт со отворена рана.

„Вибрион е близок роднина на бактеријата што предизвикува колера, но двата микроорганизми водат до многу различни болести.

Во сериозни (и поретки) случаи, инфекцијата може да предизвика некротизирачки фасцитис – ретка и опасна состојба при која ткивото околу раната се уништува.

Бактеријата може да навлезе во крвотокот, да предизвика сепса, а во некои случаи на пациентите им треба ампутација на зафатениот екстремитет“, споделува експерт за Euronews.

Поради ова, вибрион некогаш е нарекувана и „бактерија што јаде месо“.

Европскиот центар за контрола и превенција на болести веќе предупреди за зголемениот ризик од зарази со вибрион во текот на летото, особено за време на топлотни бранови.

Периодов Европа се соочува со топлотен бран и натпросечно високи температури, што придонело за развојот на бактериите.

Нивната појава, како што велат експертите, не е само здравствена криза, туку и еколошка бидејќи овие бактерии виреат во средина каде што е нарушена природната рамнотежа на морскиот екосистем.

Експертите сметаат дека Медитеранот е еден од регионите кои се најранливи пред климатските промени, па нив не ги изненадува појавата на бактериите.

Зголемената температура на водата, заедно со загадувањето и помалата концентрација на сол на крајбрежјето создаваат совршена околина за патогени како вибрион.

Експертите очекуваат и дека присуството на бактеријата да се зголеми во морската храна не само во Европа, туку во целиот свет, повторно поради климатските промени.

Генерално, инфекциите со вибрион се многу ретки и за повеќето луѓе ризикот е многу мал. Но, ако одите во Шпанија и видите забрана за бањање на некоја плажа, почитувајте ја за ваше добро.

Спирова С. | Црнобело