Рогач – темно медитеранско злато за подобро здравје

Приврзаниците на здравата исхрана неретко го користат во замена за какао, поради неговиот сличен вкус, и се колнат во бројните придобивки на оваа мешунка која потекнува од Медитеранот.

Рогачот е зимзелено дрво кое цвета во октомври, а своите плодови ги дава напролет. Исклучително отпорно на различни временски услови и штетници, бидејќи може да живее дури до 100 години, рогачот го добил своето име според формата на плодот (сличнo на рог).

Се одликува со природно сладок вкус и многу специфична арома и е одличен додаток во торти и колачи.

Буквално сите делови од дрвото на рогачот наоѓаат своја примена. Кората и листовите на пример, се користат за подготовка на разни сирупи и се одличен сојузник во борбата против алергии, настинки, сува кашлица или раните во устата. Семињата од рогачот пак се употребуваат како засладувачи на пијалаци или во замена за какао.

Рогачот воедно е многу здрав и хранлив, богат со диетални влакна, кои го подобруваат варењето на храната.

Доколку се подготвувате за детоксикација на организмот, задолжително вклучете го рогачот во вашата исхрана, бидејќи за него буквално се „лепат“ сите токсични материи и се исфрлаат од телото.

Индустријата за храна денеска произведува брашно од рогач, како најдобра алтернатива за какао и чоколадо. Интересно е што ова брашно не содржи глутен, што значи дека е особено погодно за сите оние кои се нетолерантни на оваа супстанца.

Ефектите и придобивките од рогачот се многубројни. Побарајте ја уште денеска оваа здрава мешунка во продавниците за здрава храна.

(О)Милена | Црнобело