Леонид ја доби Златната Бубамара на ДНК: „Благодарение на хуманите луѓе, здравјето му оди на подобро“

Детали

понеделник, 25 март 2024

Младиот Леонид кој е на лекување во Австралија ја доби Златната Бубамара на ДНК, по иницијатива на личноста која донира највисока сума на лицитацијата. Претходно, ДНК открија дека Лео ги добил и собраните средства.

Годинава, ДНК и Врчак освоија Златна Бубамара за „Хит на годината“, а исто како и лани, ја ставија статуетката на лицитација.

Овој пат, целта на дуото беше да собере пари за лекувањето на младиот Леонид Индов.

Кон крајот на февруари, тие соопштија дека биле собрани дури 690.000 денари од лицитацијата, а највисоката сума што била донирана се 250.000 денари.

Панчо и Андреј кажаа и дека парите се префрлени на сметка на Лео, а вчера (24.03) открија дека тој ја добил и статуетката.

„Лео конечно си ја доби бубамарата, многу ве поздрави и ни кажа дека благодарение на сите вас добри и хумани луѓе, здравјето му иде на подобро и дека нема намера да се откаже“.

Претходно, Панчо и Андреј открија дека Кирче Митрески – кој ја донира најголемата сума – побарал статуетката да му биде испратена на Лео, како потсетник дека не е сам.

„Драги наши, собраните средства од хуманата лицитација, заедно со Златната Бубамара, денес беа предадени на тетката на Лео. Господинот Кирче Митрески беше категоричен и нè замоли 'бубамарата' да стигне кај Лео, сè со цел да го потсетува дека не е сам.

Досега само од донации (не се искалкулирани телефонските донации) се собрани околу 80.000 евра, и се надеваме дека со нив ќе ја затвориме сумата која е потребна за неговото лекување во Австрија.

Тука нема да застанеме, и заедно со сите вас ќе застанеме до Лео и неговата фамилија, со што ќе докажеме дека сме сплотени кога е најпотребно“ стои во објавата од минатиот месец.

Поттикнати од пораката на новата иницијатива на Македонски Телеком „Да направиме место за вистински да се поврземе“, којашто поттикнува отвореност и меѓусебно разбирање, за што говореше и Горан Стефановски, редакцијата на CRNOBELO.com ќе направи повеќе место за добри вести и приказни кои инспирираат.

Спирова С. | Црнобело