Весна Петрушевска откри зошто одлучила да ја објави лузната по масектомијата

Детали

четврток, 17 октомври 2024

„Во овој месец на рак на дојка јас не можев повеќе да одговарам на прашања, освен да ви ја покажам фотографијата која може да ги замени сите ваши шминки, филтри и фотографии од храна, коишто ги гледаме по социјалните мрежи...“, изјави Весна Петрушевска на сцената на роденденот на Бекстејџ.

Весна Петрушевска е една и единствена во секој поглед, а и таква е во борбата со ракот. Смела, упорна и искрена пред јавноста.

Таа во розовиот октомври објави фотографија од нејзината лузна по мастектомијата.

Вчера (16.10) на роденденот на Бекстејџ, Весна доби награда „Жена борец за 2024“.

Таа на настанот откри зошто одлучила да објави фотографија од лузната по масектомијата:

„Во овој месец на рак на дојка јас не можев повеќе да одговарам на прашања, освен да ви ја покажам фотографијата која може да ги замени сите ваши шминки, филтри и фотографии од храна, коишто ги гледаме по социјалните мрежи.

Затоа е важно сите да ја дигнете општествената одговорност, одговорноста кон себеси и кон сите работи коишто ви се случуваат“.

Инаку, кога ја објави оваа фотографија, Весна напиша: 

„Октомври е месец на борба против ракот на дојка. Се утепав од читање на оваа реченица. Борба….и тоа баш во октомври. Како да одбележуваме востание.

Долга е борбата. Секоја битка е добиена војна. Немам време за луѓе кои се бават со сѐ, освен со самите себе.

Тука сум за да oставам мое наследство, во театар, телевизија, мои деца и деца и илјадници деца кои ми минуваат пред очи.

Многу е важно да се подигне свеста кај луѓето и да се поттикнат жените да одат на преглед. Мамографија, гинеколог.

Знаете ли колку жени не се грижат самите за себе, оти животов ни се претвори во преживување. Додека не се соочите брутално нема да почнете да сакате себеси.

Еден е животот и не замижувајте.

С. С. | Црнобело