Коу: Фелпс не е најголемиот олимпиец на сите времиња

Претседателот на Организациониот комитет на Игрите во Лондон, Себастијан Коу, рече дека американскиот пливач, Мајкл Фелпс, не е најголемиот олимписки шампион на сите времиња.

„Може да се каже дека Фелпс е најуспешен, но не сум сигурен дека е најголем. Кој е најголемиот олимписки шампион? Според мене сигурно тоа не е Фелпс“, рече Коу.

Американскиот пливач, во вторникот, стана спортист со најмногу освоени медали на Олимписките игри, откако како член на штафетата на САД на трката на 4x200 метри слободно, го освои 19-от медал.

Освојувачот на осум златни медали пред четири години во Пекинг, на тој начин ја престигна досегашната рекордерка Лариса Латинина, која во периодот 1956 -1964, освои 18 олимписки медали.

01.08.2012 (Макфакс)