Македонски музичари на Егзит

Само уште два дена не делат од стартот на ЕГЗИТ, најголемиот фестивал во југоисточна Европа кој по дванаесетти пат ќе ги донесе најатрактивните...

...музички имиња во моментов од светската и регионалната сцена, меѓу кои се и македонските актуелни музички артисти како Суперхикс, Мизар, Hardfaced,  June, Mileskaya, Стојче, Sound Diffusion.

На втората по големина бина на Егзит, Fusion бината, македонската музичка сцена оваа година ќе ја претстават омилениот ска-панк состав на балканот Суперхикс и култниот рок-дарквејв бенд Мизар. Настапот на Суперхикс е во склоп на нивната летна  турнеја во чии рамки настапуваат на сите значајни фестивали низ регионот. Досега тие настапуваа во Словенија, INmusic во Загреб, Rock in Plzen и Prague City во Чешка, а по Егзит продолжуваат на Punk Rock Holiday фестивалот во Словенија каде ќе настапат непосредно пред едно од најголемите имиња на светската панк-рок сцена, калифорнискиот бенд Bad Religion. Потоа следат концерти на VUM Fest во Хрватска, во Словенија на SchengenFest и Kunigunda фестивал, Pork Pie во Бугарија, и Шпанцир Фест во Вараждин каде настапуваат пред Asian Dub Foundation. Суперхикс ќе на стапат на Фјужн бината во четврток, 07 јули во 21:30 часот. Мизар после натсапот на Марс фестивал во Хрватска, продолжува истотака на Егзит, каде ќе го претстави својот последен албум „Детето и белото море“ кој наиде на одличен одзив кај музичките критичари во регионов, а нивното хрватско издание на албумот уште во мај се најде на листата на најпродавани албуми во Хрватска. На Фјужн бината Мизар ќе се појават во сабота, во 02:40 часот.
Покрај Мизар и Суперхикс, меѓу настапувачите на Fusion се Beirut, Hadouken!, Laibach, Partibrejkers, Kandžijа, Killo Killo Banda, Irie FM, Ringišpil, De Staat, Messer Chups, Eva Braun, Veliki prezir, Nežni Dalibor, Multietnička atrakcija и други.

На Explosive Stage или како ја нарекуваат „екстремната бина за екстремни луѓе“, македонскиот хард звук ќе го претстави хардкор/метал составот од Охрид Hardfaced кои на овој настап официјално ќе го промовираат  нивниот најнов албум „Show Them What They Fear“. Тие настапуваат во петок, 08 јули во 23:50 часот кога ќе ја делат сцената со имиња како „Креатор“, „Парквеј драјв“, „ Анти ноувер лиг“, „Аркона“, „Ласт хоуп“, „Вендета“ и многу други бендови.

June е уште еден бенд кој ќе ја претставува македонската музичка сцена на Егзит оваа година. Составот June е последица на развојот на соло проектот на Бомзич (Бојана Низамовкса) кој постепено прерасна во трио кое минатата година го имааше и својот настап на Таксират фестивалот како предгрупа на Nouvelle Vague. На нивниот настап на Егзит бендот ќе биде засилен и со Гоце Наумов на тапани (Сетстат, Ла Колони Волвокс). Тие ќе настапат на Exit Music Live бината во недела во 20:15 часот.

Четвртата бина која ќе донесе македонски артисти на Егзит е Urban Bug Stage. На оваа бина посетителите на Егзит ќе може да ги чујат настапите на нашите диџеи Стојче и Милескаја, во четврток во 23:50 часот. Стојче Цветановски е еден од најсвежите имиња на андреграунд денс сцената кај нас со изданија за Dogmatik, Liebe*Detail, Argumento, Gluckskind Schallplaten, а скопската диџејка Милескаја е позната кај нас како техно и хаус фанатик кој прави беспрекорен и скокотлив микс од траките кои ги избира. На истата сцена во четврток, неколку часа подоцна ќе се претстават и Sound Diffusion, заедничкиот долгогодишен проект на Александар Видиновски и Дарко Спасовски чии песни денес се ремиксувани од артисти како Uto Karem, Marko Nastic, а имаат изданија и за големите светски издавачки куќи како Definitive Recordings, Material, Argumento, Tapas и други.

Како и секоја година Exit фестивалот и овојпат ви гарантира феноменална забава! Со одличен line up, извонредна листа на хедлајнери, 20 стејџа, повеќе од 600.000 посетители и 4 дена комплетно лудило, Exit е незаборавно фестивалско искуство. Од 7ми до 10ти јули, на магичната Петроварадинска Тврдина во Нови Сад ве очекуваат најголемите имиња од светската музичка сцена како: Arcade Fire, Pulp, Jamiroquai, Portishead, Grinderman, M.I.A., Underworld, Deadmau5, Santigold, Bad Religion, House of Pain, Groove Armada, Femi Kuti, Hadouken!, Editors, Magnetic Man, Beirut, Fedde Le Grand, Kreator, Tiga, Digitalism, Laibach, Darkwood Dub, S.A.R.S., и низа други.

Влезници за Eгзит фестивалот

Четвородневните влезници за Егзит фестивалот се достапни по промотивна цена од 3650 денари само уште денес, а од вторник 5ти јули ќе стапи на сила нивната полна цена од 7350 денари.

Оваа година во продажба кај нас се и еднодневните влезници за фестивалот. Цената на еднодневните влезници чинат 1800 денари за 7ми, 8ми и 10ти јули, а 2110 денари за 9ти јули.

Од Скопје, обезбеден е организиран автобуски превоз до Петроварадинската Тврдина во Нови Сад. Цената на билетот за превоз во двата правци изнесува 2600 денари.

Влениците за Егзит фестивал може да се резервираат онлајн на www.mktickets.mk, а официјално продажно место за Македонија е Југотон (прв кат во ГТЦ, Скопје).